對財經演員的Good Buy說Goodbye
廿一世紀是資訊滿瀉的年代，打開報章雜誌手機，大量投資資訊蜂擁而來，尤其香港充斥大量沒有自主思考、跟風、驚青、劏極都仲有的散戶魚群，報章雜誌手機的投資資訊平台便成為獵戶的釣魚台。
早上打開電視機收音機手機，由證券商及衍生工具發行人贊助（開設）的財經頻道便開始一日的釣魚工作，每天製作幾個小時的「唾液現場」節目，由一班賴以為生的財演落力演出，侃侃而談冇NG，噴口水唔眨眼，最尾嗰句台詞一定是「本人沒持有上述股份」。
財演財的推介有幾好？睇下以下兩篇專題報導，一篇針對報章的專欄（見此），一篇針對雜誌的推介（見此）。看完上述兩篇分析，就知財演推介的回報差過恒指，是香港散戶應有的常識。結論是自己攞個銀仔擲公字，效果會比財演的推介更好。
更甚者，某些財演於報章雜誌手機等平台散布「別有用心」的投資資訊，然後讓自己、客戶、公司從中取利的個案屢見不鮮。典型例子是：自己先買，入齊貨之後唱好叫市民大眾買入，一邊推介炒高，一邊自己高位放貨，有辦你睇 （見此）。第一次做即皇真是搵鬼信，可能性更高的是：上得山多終遇虎、正義朋友睇唔過眼或者同行如敵國。
好彩財演於強積金無肉食，強積金的高收費只會被身為營辦人、受託人及投資經理袋晒，所以於強積金海域生存的只有極少數財演，大多來自營辦人、受託人及投資經理的代言人，以不斷叫人整合強積金戶口到其公司為主，務求收多啲基金費用。好的一面是甚少人在強積金捕食魚群（除了那些叫人犯法提早攞強積金，其他常見的還有做強積金戶口整合嗰啲agent，不過應該冇肉食，多數搭埋保險及其他基金投資一次過食你多啲）；差的一面是強積金沒有曝光率就沒有人理會，導致今時今日幾百萬強積金計劃成員十六年來對自己的強積金都不聞不問！
散戶要脫離魚群，就要對財演所推介的Good Buy 說 Goodbye，並要以自己的知識及智慧作投資判斷。沒有知識及智慧的人就要去學，好像唔識揸車唔會去揸。冇牌揸大膽車或P牌揸辣跑行快線（財演股、仙股及衍生工具），只會害己累人；正路去搭巴士及地鐵（正路ETF如恆指ETF、全球股票ETF、全球債券ETF），遲到好過冇到。另外，搵冇料到的理財顧問/銀行財富專員（實質是吸食你的資產作為其佣金的agent）來幫手就可免則免，幾friend幾熟都係咁話，免得自己隨時成為另一獵物，仲要冇左個friend，人財兩失。
Image from youtube.com