投資技巧匯總#5 – sentiment
Sentiment 中譯為「市場氣氛」，是以市場上其他人的看法作為自己投資決定的依據，與mean reversal、arbitrage、trend following 及 momentum 四種技巧不同，後者以觀察及分析市場數據作為自己投資決定的依據。
舉一個例子，新股IPO ，前文的四種技巧會分析招股書，看看同業走勢，但sentiment 反而會注重抽飛金額，如果證券商及銀行借爆孖展，食lunch 時隔離搭枱都有講申請左幾多手，自己就即衝，這就是利用市場氣氛sentiment 的投資技巧。
近年網上的社交媒體佔據了人們資訊來源的主要地位，連登、facebook、whatsapp、youtube 是信仰，令sentiment 於投資的影響力更強勁。好像契媽股、bitcoin及GME ，2021年初由sentiment 進入了各散戶心中。
Sentiment 不是由互聯網而來的新事物，二十多年前有一隻叫Tom.com 的港股IPO ，當年還未興網上登記，要股民到銀行攞招股書及登記表，猶記得該IPO登記表又有分為不同顏色，以區分收取實物股票或者是存入銀行股票戶口，由於存入銀行股票戶口可以於上市日即刻沽出賺錢，令大家多填幾份表，多開幾個戶口去抽中新股。
當年有人睇Tom.com 招股書？收支及營運？市值及估價？同行PE? 科網股trend 及 momentum ? 於裕民坊匯豐排隊的sentiment 投資的人不會理會，執輸行頭慘過敗家。
資料圖片取自網上新聞
Sentiment 除了令人不問價買入，亦叫人不問價賣出。近年例子就是2020年武漢肺炎期間，3月份的全球大跌市，美股日日熔斷，人踩人。對上有2008年金融海嘯，當年冇人知邊間銀行及保險公司唔會執笠。
Sentiment 是放大貪婪和恐懼，對膽小的投資者是好的助力，但對好勇鬥狠的人是死亡之吻。
投資技巧沒有對錯，筆者都有以sentiment 作買賣參考。以下是sentiment 常見用法：
1. 宏觀經濟氣氛
一些TAA 會以宏觀經濟氣氛作為risk on /off 的判斷，債息利率、通脹率、失業率等等，是很常見的sentiment 觀察點。不過，這些氣氛是以以年計，需要耐性及經驗去感受。例如通脹是什麼一回事，滯脹之下的人民如何生活，高息環境如何投資，這些大時代的市場氣氛屆時會佔主導地位。
2. 整體投資氣氛
指數是投資者感受整體市場氣氛的重要工具，升市時kol講出恒指會升上四萬點，人氣即時爆升，講嘅又開心，聽嘅又開心。接着傳媒、youtube、facebook 不斷抄作，FOMO (fear of missing out) 連基金經理都參與埋一份。
3. 個股氣氛
這個level 就有大量sentiment，電視、收音機、網台、blog、砒床，天天就製作出大量個股sentiment ，用幾條幼稚園級別的直線就有支持及壓力位，方便唔識字唔用腦的投資者圍爐取暖，以為學到嘢，一步一步落搭。
跟住(扮) 深少少的，就會用一些衍生工具資訊，做一些似是而非的買賣heatmap或分析，中左嗰日就話自己啲圖表有幾神奇，唔中嗰日就講第二啲無聊嘢，例如投資心法、財自方程式、初哥10大盲點等等，又或者同你講堅啲嗰啲要訂閱更進階嗰啲level 先有，而且就黎又加價，要訂就趁早。
湊住香港的投資初哥善眾就好像溝女一樣，只要日日噓寒問暖，無嘢搵嘢講，搞下貪婪和恐懼的氣氛 (sentiment)，自然會有人投懷送抱。
小結
筆者有用債息、失業率、VIX 作為宏觀及整體判斷，個股及ETF 用前文四種技巧便可。